Йошкар-Ола гыч лекмаште кугу оксам йодшо транспорт развязкым чоҥат

           Йошкар-Ола гыч лекмаште кугу оксам йодшо развязкым чоҥат. 2026-шо ийыште ик эн кугу корно проектым шыҥдараш тӱҥалыт- Йошкар-Ола гыч лекмаште Козьмодемьянск тракт дене транспорт развязкым ыштат. Проектлан 9 миллиардат 600 миллион теҥгем ойырат. Тиде Козьмодемьянск трактым нылымше гыч 10 меҥге марте ужашыште кугун пужен ыштыме нерген ойлалтеш. Тудын нерген эше 2022-шо ийыштак ойлаш тӱҥалме. Пашам кок йыжыҥлан шелме лиеш. Икымше кок ийыштыже Йыван Кырла ден Строитель урем корнывожышто кок уровенян развязкым чоҥаш да Йыван Кырла уремжымат уэмдаш шонат. Кокымшо йыжыҥыштыже эше ик кок уровенян развязкым чоҥат- Руэм посёлко тураште Йошкар-Ола деке лишемме корно ден Горький кӱртньӧ корно ушнымаште да трассын тиде ужашыжымат пужен ыштат. Чыла пужен ыштыме паша ныл ийлан палемдалтеш.

          Фото: Архив.

Источник: https://www.gtrkmariel.ru/news/sure-arches/yoshkar-ola-gych-lekmashte-kugu-oksam-yodsho-transport-razvyazkym-cho-at/