Тений республике кӱкшытан 260 меҥге кужыт корным да 200 метр кужыт кӱварым олмыкташ палемдыме

Тений «Илашлан инфраструктура» калыкле проект кышкарыште  Марий Элыште республике кӱкшытан 260 меҥге кужыт корным да  200 метр кужыт кӱвар ден путепровод- влакым олмыкташ палемдыме. Тидын нерген Республикым вуйлатыше Юрий Зайцев ик телекналын эфирыштыже ойлен. Тудо палемден: посна тӱткыш опорный илем- влаклан ойыралтеш. Опорный пунктлан перечньыштым пеҥгыдемдыме. Тений верысе кӱкшытан 16 меҥге корным олмыктат. Тушечын кок меҥгат 300 метрже Волжскышто, кумытшо Звениговышто, кок меҥгыже Козьмодемьянскыште улыт.
            Лишыл жапыште кугу инфраструктура проектым илышыш шыҥдараш тӱҥалыт: Козьмодемьянск трактын нылымше гыч 10-шо меҥге марте ужашыжым. Тидыже Йошкар-Олаш пурымо да Йошкар-Ола гыч «Поветлужье» трактыш лекме корным эрыканрак ышташ полша. Тений тӱҥалшаш икымше йыжыҥыштыже Руэм посёлко деч Черняков урем марте ужашым пужен ыштат. Тыгак кок уровенян развязке лийшаш. Тудо кӱртньӧ корно ӱмбач ышталтеш, а полосаже кудыт марте ешаралтеш. Кокымшо йыжыҥже Черняков бульвар деч Бауман урем марте ужашым авалта. Туштат кок уровенян развязке лиеш.
              Проектым 2030-шо ий марте палемдыме. Тудын акше 10 миллиард наре теҥге,- увертарен Юрий Зайцев да ешарен кызыт подряд организацийым рашемдыме паша кая.

Источник: https://www.gtrkmariel.ru/news/sure-arches/teniy-respublike-k-kshytan-260-me-ge-kuzhyt-kornym-da-200-metr-kuzhyt-k-varym-olmyktash-palemdyme/